Rusiye uçucısızlarınıñ iyulniñ 24-ne keçer gecesi endirgen darbesi neticesinde Odesanıñ tarihiy merkezinde Ukrayina medeniy mirasınıñ yedi obyekti zarar kördi, dördüniñ milliy emiyetli abide statusı bar, dep aytıla Ukrayina medeniyet ve informatsion siyaset nazirliginiñ saytında.
UNESCO Dünya mirası cedveline kirgen şeer merkezinde yıqıntılar qayd etildi. Fasad, dam, pencere ve diger bina qısımları zarar kördi.
Vorontsov sarayı (şimdiki Bala ve gençlik sanatı sarayı), Rodokonaki ev (şimdi Hotel de Versal öteli), «Londonskiy» öteli, Meşçan şurası binası, Meyva passajı («Privoz» bazarınıñ bir qısmı) zarar kördiler.
UNESCO Rusiye raketa ve uçucısızlarından çoq zarar körgen Odesanıñ tarihiy merkezi etrafındaki vaziyetten qasevetlengenini çoq bildirgen edi. 2023 senesi iyulniñ 23-nde raketa darbesi neticesinde Odesada Spaso-Preobrajenskiy kafedarl kilsesi zarar kördi, bu yıl yanvar ayında ise «Bristal» öteliniñ tarihiy binası ciddiy seviyede zarar kördi.
İyulniñ 24-ne keçer gecesi Rusiye Ukrayinağa daa bir büyük darbe endirdi, hususan «Şahed» olğan 103 darbe dronını ve dört raketanı uçurdı. Memleketniñ çeşit regionlarında mesken kvartallar, energetik infrastruktura ve vatandaş obyektleri zarar kördi.
