Rusiyede gece dronlar Stavropol civarındaki «Nevinnomısskiy Azot» zavodına ücüm ettiler, dep haber ete ASTRA Telegram kanalı.
İyün ayında haber etilgenine köre, bu zavod uçucısızlarnıñ ücümine oğradı – Ukrayina Silâlı quvetleri onı «patlayıcı madde, silâ ve raketa yaqarı içün esas parçalar yapqanlardan biri» olaraq tasnif etti.
Nevinnomıssk şeer yolbaşçısı Mihail Minenkov 37 «darbe» aqqında ayttı, zararlar belli degil.
«Vaziyetni kontrol etemiz. Er kesten qasevetlenmemege ve öşek tarqatmamağa rica etem», – dedi o, Telegramda «Azot» zavodınıñ videosını derc etip.
Dronlarnıñ «ücümleri» Rostov vilâyetindeki Novoçerkasskta qayd etildi, anda bir çoq sanayı işhanesi bar. Rostov vilâyetiniñ valisi Yuriy Slüsar sekiz rayonda uçucısız ücümi keri qaytırıldı, dep bildirdi. Darbe ve yıqıntılar aqqında aytılmay.
Krasnodar ülkesiniñ valisi Veniamin Kondratyev Timaşevsk şeerinde uçucısız parçaları vokzağa tüşip, şeerden keçken yolcu treniniñ vagonlarından birine zarar ketirdi. Eki insan yengil yaralandı.
«Uçucısız tüşkeni neticesinde Timaşevsk vokzalı elektriksiz qaldı, şimdi endi tiklendi. Demir yolunda zararlar qayd etilmedi», – dep yazdı Kondratyev.
Rusiye Mudafaa nazirligi doquz regionda ve Azaq deñizinde 105 uçucısız, eñ çoq Belgorod, Brânsk ve Rostov vilâyetlerinde urıp tüşürildi, dep bildirdi.
Muarririyet bu malümatnı mustaqil şekilde tasdıqlap olamay.
Ukrayina arbiyleri bu haberlerni şimdilik izaatlamadı.
Rusiyeniñ Ukrayinağa qarşı büyük istilâsı başlağan soñ Rusiye regionları ve işğal etigen topraqlar dronlarnıñ ücümlerine muntazam sürette oğray. Ukrayina tarafı böyle darbelerni er vaqıt izaatlamay, amma istilâcınıñ ücüm imkânlarını eksiltmek içün Rusiye ordusınıñ bazalarını zayıflatmağa tırışa.
